Svartar Samsæriskenningar....

Ég er með kenningu!

Ég held að feðgar sem kenndir eru við grís eigi sök á öllu því sem aflaga fer í þjóðfélaginu í dag og undanfarnar vikur......! Ég efast ekki um að þeir hafi, á sínum tíma, komið því til leiðar að svarti maðurinn í Ðe Júnæted Steits of USA, eins og Fleksnes sagði hér um árið, fékk húsnæðislán á góðum kjörum sem leiddi svo til þess að bankar í Íslandi hrundu eins og spilaborg nokkru síðar....... Án þess að ég hafi nokkra fordóma gagnvart svartamanninum. Sumir af mínu beztu svörtumönnum eru vinir Wink

Ég efast heldur ekki um að þeir hafi fórnað sínum banka svo maðurinn í Svörtu Loftum fengi hefnt sinna harma - ég meina hafiðið séð hvað er að gerast í grísabúðinni? Það er Þorláksmessa upp á hvern dag. Biðröð út í mjólkurkæli og ein verzlunarferð tekur meðalvinnudag!!

Hvar eru þessir menn í dag? ha? Eru þeir ekki enn að díla og víla? Díj - ég vildi að ég hefði fattað uppá þessu...... W00t

En að allt öðru! Eins og alþjóð veit - eða allavega þeir sem lesa bloggið mitt - er ég að prjóna peysu! Peysuprjónið byrjaði í kappi við Möggu sem er, bæþevei, löööööngu búin að vinna þessa keppni og hefur gengið í sinni peysu í upp undir ár, gott ef Magga er ekki búin að skella svörtum leðurbótum á olnbogana á peysunni, svona eins og bókararnir voru með í denn, til að hægja á sliti....... en allavega, svo ég reyni nú að halda þræði, þá er nú svo komið að ég er að prjóna berustykkið! Hrikalega skemmtilegt, mynstur og allskonar litir... nema  hvað.... ég er í dotlum vandræðum með dokkurnar, þær flækjast fram og til baka, alveg sama hversu hratt ég prjóna Tounge 

Mig vantar sumsé vin, til að halda dokkunum aðskildum á meðan ég prjóna..... þessi vinur má ekki tala mikið, vegna þess að ég ræð ekki við að prjóna mynstur og tala á meðan.... Blush Þessi vinur má hins vegar vera gúddlúkking!

Ég ætti kannski að leita að honum í bók eftir Snjólaugu Braga? Mér sýnast kröfurnar vera um þessa sterku, þöglu týpu W00t

Þakka þeim sem hlýddu Heart


Vöruskipti?

Við Ljónshjartað vorum að koma inn. Fórum út að skokka í góða veðrinu. Tókum sex kílómetrana okkar og stóðum okkar bara sæmilega, miðað við aldur og fyrri störf.

Svakalega gott að skokka í rigningu og logni! Það er eiginlega vorfílingur í veðrinu - við sáum flugur og allt...... Sáum líka flott ljós í glugga hjá Soffíu Páls. Fundum hund í óskilum og leyfðum honum að vera samferða okkur yfir götu. Hann snéri svo upp á sig og þóttist yfir það hafinn að vera í fylgd með fullorðnum og hvarf inn í einhverja hliðargötu. Fundum líka mann í óskilum - hann vildi endilega fylgja okkur áleiðis og sagði okkur frá öllum sínum hundum og köttum........ það endaði með því að við stungum hann af inn í einhverja hliðargötu! Við höfum nefnilega ekki áhuga á mönnum í óskilum...... Halo

Þegar ég var búin að teygja eftir öllum kúnstarinnar reglum og röðin var komin að því sem ég virkilega var búin að hlakka til frá því að ég vaknaði....... sumsé að hella mér uppá gott kaffi - búin að fara út í bakarí og allt, maður tekur enga sénsa á að missa vigt - það er jú kreppa, sjáðu til og ef það er eitthvað sem ég get haldið í, þá eru það kílóin..... Tounge þá uppgötvaði ég að ég átti ekkert kaffi! 

Hvert ykkar er búið að hella uppá? Ég get lagt til rúnstykki og sætabrauð en ég lofa engu með skemmtilegan félagsskap!

 

 


Stílhrein og spontant

...chez moi ;)

Ég þurfti út á pósthús áðan! Skórnir mínir voru náttúrulega blautir frá því í gær - þegar ég fór ekki í pollana muniði? þannig að ég fór í stígvélin mín! Þau eru hrikalega flott - brún með hælum.......

Þegar ég var komin í þau, áttaði ég mig á því að ég var ekki í neinu í stíl við stígvélin - þannig að ég stakk debetkortinu í vasann.......W00t

 


Chaplin vs Poppins

Fór út í göngutúr í "góða veðrinu" Tók Ljónshjartað með - honum finnst svo gaman úti í svona veðri.....

Ég klæddi mig í pollabuxur og regnkápu en hann fór í endurskinsborðann sinn Tounge Eftir um það bil tíu mínútur úti var ég orðin svo haugblaut að það hefði engu máli skipt þótt ég hefði vaðið í alla polla sem ég sá - blautari hefði ég ekki orðið! Þrátt fyrir það hélt ég áfram að sneiða hjá pollunum.........  Vatnið lak af pollabuxunum oní skóna og ég fann hvernig smám saman varð ég kátari og kátari. Þegar ég var að nálgast hesthúsin var ég farin að syngja - hástöfum W00t en það skipti svo sem engu máli það heyrði enginn í mér Tounge Mér fannst ég svo létt á fæti að ég íhugaði alvarlega að taka Chaplin hopp - hefði það ekki verið fyrir rokið sem hefði umsvifalaust breytt Chaplin í Poppins........ - án regnhlífar þó.

Nú sit ég - orðin þur aftur, komin í uppáhalds átfittið, djúpar og lopa Cool og velti því fyrir mér af hverju það sé svona innbyggt í mér að hoppa ekki í polla?

 


- ____________ O I

Við Ljónshjartað fórum út að skauta í morgun! Tókum stóran hring í rigningu og hálku - lékum ýmsar listir og Lokharður fékk verðlaun fyrir.... ég fékk ánægjuna af að vera úti með honum Wink

Muniði eftir styttunum sem voru til á öllum betri heimilum í gamla daga......? Sé ekki, heyri ekki og einhver ein enn sem ég man ekki hvernig var..... ég fór nefnilega gleraugnalaus út - sem þýðir að ég sé ekki rassgat W00t en þegar svona viðrar sé ég hvort sem er ekki neitt........... Það kom þó ekki í veg fyrir að ég sæi fallega iðnaðarmanninn minn - ekki bara einu sinni - heldur tvisvar Joyful Fékk meira að segja bros líka, gæti þó verið að hann verið að glotta að Ljónshjartanu sem áttar sig ekki á því að þegar við erum komin inn í íbúðabyggð þá hættum við að leika listir Tounge 

Heim komin tilkynnti ég Mömmusinnardúlludúski að þegar við værum orðin atvinnulaus - þá gætum við opnað sirkus! Látið hundana leika listir sínar....... eitt atriðið gæti verið að fella mann á hjóli - eða að draga björg í bú - eins og ég kýs að kalla það Sideways

Mér finnast eiginlega sorglegust í þessu kreppuhjali öllu saman - viðbrögð fólks við hækkunum á áfengi! Allur sá peningur sem skilaði sér þar í ríkiskassann, sem bæ þe vei, er ekki að gera nokkurn skapaðan hlut fyrir fólkið í landinu hefði kannski verið betur kominn í að styrkja börn í Malaví.....?

Ennfremur legg ég til að seðlabankastjórn ásamt seðlabankastjórum og fjármálaeftirliti segi af sér!

Farin að prjóna....... eða even better! Baka Happy

Einhver sem getur ráðið dulmál fyrirsagnarinnar? Pouty


Sólkerfi minninganna

Endur fyrir löngu var ég í sveit í Vopnafirði.......

Þetta sumar var ég voða skotin í strák sem átti heima inni á "Tanga". Ég var fimmtán, hann var eitthvað eldri, enda alltaf verið veik fyrir eldri mönnum Wink Af minni alþekktu tillitssemi ætla ég ekki að segja hvað hann heitir en nafnið var ættað utan úr geimnum Joyful

Sautjánda júní dönsuðum við saman allt kvöldið - seinna bauð hann mér í partý heim til sín. Við vorum í góðu glensi í stofunni að hlusta á tónlist þegar hurðin opnaðist og inn stormaði mamma hans - í Hagkaupsslopp með rúllur í hárinu - hún lækkaði tónlistina, án þess að segja orð og strunsaði síðan út úr stofunni aftur og lokaði hurðinni á eftir sér....... Mér fannst það vandræðalegt þá en hrikalega fyndið núna Tounge

Ég sé hana enn fyrir mér, en man engan veginn hvernig strákurinn leit út W00t

Þetta rifjaðist upp fyrir mér rétt í þessu þegar Mömmusinnardúlludúskur spurði mig, þegar ég var á leið undir rúm, hvort ég ætlaði ekki að horfa á Prison Brake með sér! 

Ég sagði honum að ef hann héldi fyrir mér vöku þá mundi ég ekki hika við að storma inn í stofu í Hagkaupsslopp með rúllur í hárinu W00t

Hann þagði stundarkorn en benti mér síðan á að ég ætti ekki Hagkaupsslopp og þaðan af síður rúllur.......

Nú situr hann og horfir á Prison Brake - í stofunni. Ég er hins vegar undir rúmi að rifja upp gömul skot... sár Sideways

Pís & lov Heart


Viltu koma með...

mér í flensusprautu? Spurði mamma - og tókst ótrúlega vel að láta það hljóma freistandi... W00t en þar sem ég er nú frekar mikið fyrir að láta ganga á eftir mér.... sagði ég henni að mér þætti nú alltaf svolítið skemmtilegt að vera veik Tounge Hún tilkynnti mér þá að sér þætti ekkert gaman þegar ég fæ lungnabólgu - en þá á ég - eins og ég sagði henni, oft mín beztu móment! Undir þeim kringumstæðum hef ég samið sögur og þýtt þær yfir í ensku og dönsku. Þetta er ég ekki fær um að gera þegar heilsan er í lagi Sideways

Ég hef barist í dag við að koma almennilegum hita á ofnana heima hjá mér. Uppgötvaði allt í einu að húsið var orðið gegnkalt og þá tekur svo langan tíma að ná upp dampi! Ég er með kol í kjallaranum sem ég moka í eldinn.... eins og í lestunum í gamla daga! Muniði eftir þeim? Þegar maður þurfti að moka kolum frá Kolviðarhól að Draugabrekku? Cool 

Ég er með hugmynd að flutningi á vatni fyrir Jón Ólafs vatnagúru frá vatnsverksmiðju að höfninni í Þorlákshöfn. Ég ætla að gera honum tilboð í lestarteina í nokkuð beinni línu niður að sjó! Brill? Ég veit.... Tounge og það verður sko engin kolalest spúandi reyk út í umhverfið - nei nei þetta verður vetnislest - kemur til með að ganga fyrir vatni.... Tounge Vitiði númerið hjá Jóni? Þetta er eiginlega hugmynd sem hann getur ekki misst af!!

Ég heyrði í útvarpinu í gær að eftirspurn eftir lífvörðum og öryggisgæslu hefur aldrei verið meiri! Allt frá því að fólk fær sér öryggiskerfi með neyðarhnappi og upp í að vera með lífvörð allan sólarhringinn!

Ég sá Geir H og Davíð alveg fyrir mér með lífverði 24/7 og fór að velta því fyrir mér hvar þeir létu þá sofa Happy Sem varð til þess að ég fékk aðra hrikalega góða hugmynd! Ég ætla sko að fá mér svona lífvörð! Þeir eru líka alltaf í svo góðu formi..... Tounge

Fór í vatnsfimi í morgun og er alveg hrikalega þreytt í fótunum eftir tímann - sem þýðir bara eitt! Beta er frábær kennari ;) Ég veit hinsvegar að Heiðdís er þreytt í höndunum en það er bara vegna þess að hún var með bláa núðlu og þær eru, samkvæmt því sem hún segir, miklu þyngri en hinar núðlurnar..... Pouty

Eftir tímann fengum við slökun - en þá látum við okkur fljóta um laugina við undirleik róandi tónlistar og látum hugann reika - eða ekki....... Ég er alltaf komin eitthvað allt annað enda alltaf verið á undan..... Tounge

 


Fyrsti vetrardagur liðinn....

.....og nístandi kuldinn sem fylgdi honum kom á óvart

Helgin hefur þó verið góð enda bý ég svo vel að eiga kuldagalla frá 66 gráðum norður - sem ég hika ekki við að nota þegar aðstæður sem þessar myndast Tounge Ég meina bjútí is pain - en ekki svona mikið........ Það verður bara að hafa það þó ég virki minna þokkafull úti að ganga með Ljónshjartað - enda má ég alveg við því að missa nokkrar gráður á þokkaskalanum svona yfir háskaðræðistímann.....

Kíkti í heimahús í gærkvöldi og sötraði þar rauðvín í góðum en þó vafasömum félagsskap við heimspekilegar umræður. Í nótt gnauðaði vindurinn á glugga en ég svaf svefni hinna réttlátu fyrir innan, í hlýjunni......

Ég las heila bók á einni aðfaranótt laugardagsins! Ég hreinlega man ekki eftir því að ég hafi afrekað það áður. Fanney! Ég er ready í bókmennta umræður. Svakalega góð bók - ég sveiflaðist allan tilfinningaskalan, varð reið, hló og grét allt á einni nóttu takið eftir því - ég held að það hafi ekki skeð síðan......... tjah bara aldrei! W00t Löggunni fannst ég enda fremur grunsamleg klukkan hálffimm um morguninn þar sem ég stóð í algjöru uppnámi og starði inn um mína eigin glugga, þegar við Ljónshjartað brugðum okkur út að míga við þjóðveginn og enn tortryggnari urðu þeir þegar ég mætti skömmu síðar með Hlín Hrekkjusvín út við sama staur Tounge Það skal þó fúslega viðurkennt að útlitið var ekki upp á marga fiska þegar Tína mína fína mætti í "morgunkaffi" eins og ég kaus að kalla það - hún vildi hinsvegar meina að það væri miður dagur Kissing 

Nú mallar kjúklingurinn í Indíánapottinum mínum við hægan hita í ofninum, þar sem við Mömmusinnardúlludúskur komumst að samkomulagi um það að hafa matinn seint að hætti þeirra Evrópubúa sem búa þó þetta sunnar í álfunni - eða eftir Dagvaktina, því ég neita staðfastlega að borga áskrift að stöð2 og held því fram að það sé ekkert áhugavert efni þar að finna og því þarf hann að leita út fyrir öryggi heimilisins til að horfa á þá þætti. Ég verð bara að vona að þetta hafi ekki langvarandi djúpstæð áhrif á hann....... 

Þakkið fyrir að ykkur sé hlýtt Joyful


Götóttir lopasokkar

Veðrið hér var svo leiðinlegt í morgun að meira að segja hundarnir nenntu ekki út! Þau stóðu í hurðinni og horfðu á mig um leið og þau spurðu mig hvort ég hefði aldrei heyrt um veður sem væri ekki hundum út sigandi í? Meira að segja Hlín - hrekkjusvín - vildi ekki fara út, þó er það skemmtilegasta sem hún gerir þessa dagana að éta snjó. Hún er meira að segja farin að taka upp á því að segja mér að hún vilji fara út að míga og er svo bara að plata mig og borðar snjó í massavís. Ég þarf að segja henni söguna um drenginn sem kallaði alltaf "úlfur úlfur"Sideways

Ég heyrði aðeins í vinkonu minni í Bretlandi í morgun.

Hún sagði mér að þar í landi væri fólk að vakna upp við að þetta þarna.... þið vitið..... sem má ekki tala um á Íslandi...... væri að skella á af fullum þunga..... ég spurði hana hvort stjórnvöld þar í landi hvettu fólk til að verða góð við börn og gamalmenni - eins og þau gera hér af gæzku sinni W00t

Hún sagði mér að börn og unglingar í Bretlandi væru löt, leiðinleg og hyskin sér, þannig að við komumst að þeirri niðurstöðu að það skipti engu máli þótt það væri kreppa í Englandi Tounge

Úpps þar sagði ég það..... Sideways

Þakka þeim sem hlýddu Heart

 


Snjórinn

...kom eins og himnasending!

Ég auglýsti nefnilega vetrardekk til sölu á kassi.is og það var eins og við manninn mælt - það byrjaði að snjóa!

Það hefur heldur ekki stoppað hjá mér síminn! Ef ykkur vantar dekk þá er mömmusinnardúlludúskur dekkjasafnari af guðs náð og kjallarinn hjá mér er kjaftfullur af dekkjum. Ég veit ekki hvursu tengdur hann er þessum  gúmmítuðrum þarna niðri. Það kemur líklega í ljós þegar á að fara að slíta þau af honum!

Þetta minnir mig einna helst á það, þegar ég var að reyna að venja hann af snuði! Það tók nú sinn tíma - enda var hann soddan krútt með snuð!

Nú er hann krútt með snúð Sideways


« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband