Rok....

.......moldrok!

Ímyndið ykkur alla þessa mold, sem berst svo inn um gluggana mína og sest að hjá mér, eingöngu hluti af henni fýkur þarna út á sjó, bróðurparturinn er hér! Ég gæti hugsanlega gróðursett kaktusa í mublunum

Og ég sem ætlaði að taka til í dag.....

Heppin?!¿

Regnboginn

Ég er Pollýanna, endurfædd.....

....Ég er með litla glerkristalla hangandi í eldhúsgardínunum hjá mér. Þegar sólin skín í gegnum þá, á kvöldin, mynda þeir regnbogamynstur upp um alla veggi í eldhúsinu mínu, þessa litlu dropa í öllum litum.... Ég sit agndofa og fylgist með.....

Vona samt að ég detti aldrei niður úr tré og fótbrotni og þurfi virkilega að NOTA spekina hennar, því ekki gekk það svo vel hjá henni!

Annars er ég búin að vera hrikalega dugleg í dag, alveg frá því að ég vaknaði..... aftur

Er samt að spá í að fara að sofa núna.

Góða nótt, sofðu rótt, í alla nótt

Morgunsól

Vaknaði örlí, og þá er ég að meina snemma...... Sólin skein, ekki bærðist blað á grein og fuglarnir sungu sitt dirrindí.

Fór út með litla kút og við skokkuðum í morgunsólinni, þ.e. ég skokkaði og hann kom og lötraði við hlið mér þegar hann þurfti að kasta mæðinni.... en hann er nú líka fjórhjóladrifinn Kom svo heim, vakti drenginn og sendi hann í vinnu - einhver þarf að vinna - fékk mér að borða, kíkti í blöðin, fór í sturtu. Nú er sólin farin og ég er að spá í að gera það líka. Fara alltsvo - rúmið kallar á mig og er eitthvað svo freistandi óumbúið og tilbúið

Veriði stillt á meðan!

Grunsamlegar mannaferðir um blánótt....

Ég er andvaka.....

.....vaknaði fyrir röskum tveimur klukkutímum við að það var eitthvað illt á sveimi! Tók strax þá ákvörðun að fara öryggishring um íbúðina, fann drenginn inni í stofu að horfa á Prison Brake - ekkert illt þar - hundinn sofandi frammi - ekkert illt þar - engir ofnar láku, engir innbrotsþjófar biðu mín handan við hornin með illyrmisleg glott á vörum og kúbein í höndum.....

Samt var svo mikill óhugur í mér að ég tók meðvitaða, helkalda ákvörðun að senda drenginn út með hundinn, þeir gætu þá migið í leiðinni.... Já ég sendi drenginn, sem mér þykir tiltölulega vænt um út með labbakút, bláköld og hefur nú litli labbakútur ekki það orð á sér að vera hugumstór!

Sem þeir komu niður tröppurnar, fundu þeir möndulveldi hins illa, þá miklu uppsprettu. Undir tröppunum hjá mér sátu þrír ungir menn í bíl, þeim brá heldur í brún, enda drengurinn ekki árennilegur, fremur en móðir hans, og þeir gátu ekki með nokkru móti vitað að hundurinn gerir ekki flugu mein! Drengurinn spurði þá bara sisona, algjörlega óttalaus, hvort hann væri eitthvað að trufla þá en þeir sögðust bara vera að ztjilla..... Mávarnir hlógu hæðnislega á næsta plani á meðan þeir týndu upp rusl dagsins..... Nú háttar þannig til að í húsum allt umhverfis mig er mikið af allskyns skjávörpum, tölvum og flatskjám... og innbrot hafa verið nokkuð tíð, sérstaklega seinni part vetrar. En svo ég víki nú aftur að atburðarrás þá ákvað drengurinn að reykja eina sígarrettu uppi á palli, hann gekk síðan aftur niður til þeirra þar sem þeir voru búnir að færa sig að næsta húsi í ztjillingu og benti þeim blákalt á að þeir skyldu átta sig á því að það mundi ekkert koma fyrir í okkar húsi og ekki heldur í næstu húsum, þeir urðu fremur lúpulegir, sögðust bara vera að koma úr bænum (aðkomumenn sjáiði til.....) og vera á leiðinni á Eyrarbakka....

Á meðan á öllu þessu stóð, keyrðu þrír lögreglubílar fram hjá húsi mínu, þeim þótti engin ástæða til að hægja á sér einu sinni, enda ekki öllum jafn gefið að vera svona næmir fyrir hinu illa eins og mér....

En nú var ég að uppgötva að ég gleymdi að fara öryggishringinn í kjallaranum og hjólið mitt er úti, mitt eina farartæki! Hvað geri ég? Vek drenginn? Sendi hundinn niður? Áttar hann sig á því að tékka á hvort hurðin er læst? Eða fer ég sjálf? Og hverf?

Ef það heyrist ekkert frá mér, þá voru þeir á grunsamlega grænum bíl. Þið látið kannski einhvern fullorðinn vita.....

 

Frí í sumar....

Finn arfavel fyrir mætti letinnar í þessu mínu sumarfríi. Sem er bara hið bezta mál. Ég vakna yfirleitt snemma og fer út, bara til að geta komið inn aftur og skriðið upp í rúm og lesið og sofið aðeins lengur....  

  Núna stendur valið á milli þess að prjóna, sem ég finn bara um leið og skrifa að ég nenni ekki, fara út í búð, sem ég nenni ekki heldur - en verð.....

.....eða lesa bókarkorn og dotta aðeins sem virkar verulega freistandi á mig.

Eitt og aðeins eitt er að trufla mig og það er hvernig stendur á því að konur vænta lægri launa fyrir sömu störf og karlmenn? Hví? Pourquoi? Why?

Hana þar er ég búin að droppa tungumálakunnáttu minni nóg í dag......

Bezt ég hlaupi út í búð og dotti þar

Hvernig finnst ykkur þessi mynd af mér?

læfisgúd  - Til hamingju með daginn konur OG karlar!

Ég.....

 ....er lítið gefin fyrir þjóðhátíð, þannig að ég tók daginn ekki sérlega hátíðlega. Var á leið í langa göngu með litla stúf, þegar við mættum skrúðgöngunni. Við dokuðum við á meðan hún rann hjá, fyrst var hann spakur að bíða bara rólegur hjá "mömmu" sinni. Svo varð hann hræddur við trommusláttinn (kom mér verulega á óvart, því nú er hann bróðir hans Ljónshjarta ) og leitaði skjóls hjá mér, sem var nú í lagi ég var meira en tilbúin að vernda hann fyrir þessum hræðilegu hljóðfærum. Svo sá hann að það voru hundar á ferli í skrúðgöngunni og mannaðist (eða segir maður hundaðist....?) nú heldur, restaði á því að hann bauð einum Rottweiler í fighting - þá nefndi ég við hann að það væri þjóðhátíð og maður snapaði ekki fighting þennan dag. Hann lét sér segjast.....

Kom svo heim og fór að taka til og þvo þvotta- enda ekki vanþörf á - hef ekki nennt að taka til síðan ég byrjaði í sumarfríi. Nú er allt hreint og fínt, eins og í bók eftir Snjólaugu  Braga, stubbalingur steinsefur og ég gleymdi að fara í plöntuskoðunarferð út að Vatnsenda á degi villtra planta. Af hverju minntuð þið mig ekki á það?

Dízes, hvernig gat ég gleymt þessu? Þetta var það eina sem ég ætlaði að gera í dag..... Vell það er huggun harmi gegn að það vottar ekki fyrir harðsperrum eftir hlaupið í gær!

Svona er að vera húsmóðir.....

 

 

Kvennahlaup og önnur hlaup....

                            Við Magga hlupum 5.7 km. á ca. 45 mín. Pretty good I would say - eins og við segjum á frummálinu.....

 

Fórum svo og heimsóttum pabba, hittum mömmu þar og drógum hana með okkur á Kaffi Krús.

Grillaði svo með mömmu í kvöld, við sötruðum rauðvín og slúðruðum.

Yndislegt

Takk fyrir frábæran dag Magga og mamma

Mikið að gera í sveitinni....

 Sló suðurtúnið í gær! Fór svo með mömmu og við keyptum rafmagnssláttuvél - alltaf gaman að eyða annarra manna peningum... fórum svo í Hveragerði og keyptum sumarblóm í garðyrkjustöð Ingibjargar - ég missi mig alltaf í svona garðyrkjustöðvum. Mér finnst öll blóm flott og vil taka þau með mér heim.

Sá þar appelsínugul blóm sem ég féll algjörlega fyrir......´

 Búin að vera rosa duglega að æfa fyrir kvennahlaupið sem við Magga ætlum að KEPPA í á morgun. Ath!!!! Ég sagði KEPPA ekki TAKA ÞÁTT - mikill munur þar á. Ég er búin að stúdera leiðina svo við villumst nú örugglega ekki. Það er svooooo erfitt að vera í forystunni  Gott að það eru rauðir bolir - því ég, eins og danskurinn segir verð "selv lysende, en fin egenskab at udnytte i mørke som advarsel til andre" Þegar við erum búin að vera úti að hlaupa...... Vitaskuld er hann að djóka!!!!!

Sáuð þið hana systur mína í fréttunum áðan? Ég er svo stolt af henni alltaf hreint (þ.e. þegar hún gerir eitthvað sem mér þóknast..... ) Hún skýrði frá því að hún - ok ok eða sveitastjórnin sem hún vinnur fyrir hefðu ákveðið að setja bremzu á Urriðafossvirkjun að svo stöddu.

Fór svo í langan labbitúr með stubbaling, löbbuðum alla leið út í skóg, fórum svo stóran hring í skóginum - hittum Rauðhettu og úlfinn - og flýttum okkur heim. Þar biðu þá eftir okkur Eygló, sem er svona okkar eigin Flórens - alltaf gott að hafa eina í fjölskyldunni..... Stebbi og Mamma og vildu fá okkur í heimsókn upp á sjúkrahús að heimsækja pabba sem var að koma úr mjaðmakúluaðgerð og er svo stálheppinn, að sögn Reykvíkinga, að búa úti á landi þar sem héraðssjúkrahúsið getur tekið á móti honum. Hann fær að liggja þar næstu tíu daga í stað þess ef hann byggi í Reykjavík hefði hann verið sendur heim í dag - á fjórða degi eftir aðgerð....

...ansi kalt eitthvað. En svo er hann búinn að fá inni á NLFÍ í Hveragerði eftir spítalavistina. Hann er sko algjör hetja hann pabbi minn. Eftir áralanga baráttu við krabbamein, og allar þær meðferðir sem því fylgja, þar sem stefnir í hans sigur!!!! skellir hann sér í mjaðmakúluaðgerð. Ekki margir, held ég sem hefðu þrek í þetta.

Well bezt að fara að sinna labbakút, hann vill fara út - eða bara fá athygli mína.... skrýtið hélt hann mundi kannski athyglismettast þegar ég færi í sumarfrí en hann vill alltaf meir og meir..... sem er sossum í lagi... hann á það alveg skilið - þetta krútt

smjúts

Vér mótmælum...

 Að vandlega íhuguðu máli og vegna þess að ég flana aldrei að neinu svo ég verði nú örugglega ekki talin örgeðja, skapvond eða illa stödd í tíðahringnum, hef ég ákveðið að mótmæla launahækkunum seðlabankastjóra í dag.

Ég ætla að fylgja fordæmi sem Davíð setti svo eftirminnilega hér um árið og og fara í Seðlabankann seinni partinn, taka allan minn pening þar út og loka öllum reikningum. Innlendum sem erlendum!!! Í framhaldinu mun ég stofna reikning í Sviss þar sem bankastjórar eru á skítalaunum.

Hvet alla til að fylgja fordæmi mínu!

 

 

 

PS veit einhver hvað Davíð er að gera í dag?

PSS þið þekkið mig á því að ég verð á rauðum skóm, með varalit og hund að þrasa við dyravörðinn um hvort hann megi koma inn eður ei......

eitthvað.....

.....til að dunda ykkur við á meðan ég fæ mér morgunmat

http://users.skynet.be/bk258512/idiot_test.swf

Góða skemmtun