Skápasaga.....

Nú haldið þið náttúrulega að þið fáið svæsna samkynhneigða sögu í anda Ellýjar.....

....en það er nú öðru nær!

Í stofunni "heima" stóð alltaf skápur sem pabbi hafði á sínum tíma lagt til í búið. Í skápnum var geymdur kristallinn, silfurborðbúnaðurinn og jólastellið. Í einni skúffunni geymdi mamma svo alla skartgripina sína. Stundum, þegar Eygló kom í heimsókn, skoðuðum við allt sem var í skúffunni og suðuðum í mömmu hvort við mættum eiga þetta eða hitt..... Innan í eina hurðina hefur pabbi skrifað niður símanúmer bróður síns í hvert sinn sem hann flutti, allt fimm stafa tölur! Stundum hugsa ég hvort andar hins liðna muni svara ef ég hringi.....

Mér fannst þessi skápur alltaf fallegur og hafði vit á að hafa öðru hverju orð á því.

Fyrir nokkrum árum skiptu mamma og pabbi um húsnæði. Þau "minnkuðu við sig" fluttu úr húsinu sem þau höfðu búið í síðan 1960 og pabbi byggði.

Eins og gefur að skilja var ekki pláss fyrir allt sem þau áttu í nýja húsnæðinu. Pabbi spurði mig þá hvort ég vildi ekki taka skápinn. Ég var himinlifandi og snögg að þiggja hann.

Nokkru seinna spurði ég pabba hvar hann hefði keypt skápinn. Þá kom í ljós að maðurinn sem byggði og bjó í húsinu sem ég á núna, var húsgagnasmiður og hafði smíðað þennan skáp.

Það má því segja að skápurinn sé kominn heim.........

Nú stendur hann í stofunni "heima" og geymir m.a. kristalinn minn sem ég keypti í verksmiðju Iittala á ferð minni um Finnland sl. sumar. 

Mér finnst þessi skápur alltaf fallegur - ekki síst fyrir allar minningarnar sem hann geymir.

Athugasemdir

[Jóna Á. Gísladóttir, 28.7.2007 kl. 19:53]

Yndisleg saga Hrönn. Þvílík tilviljun með smiðinn. Og gott að þú hafðir ''vit á'' að minna reglulega á hversu hrifin þú ert af skápnum.

[Jenný Anna Baldursdóttir, 28.7.2007 kl. 19:56]

Það er ekkert til sem heitir tilviljanir.  Allt planað af almættinu og skápurinn sótti heim, auðvitað.  Allir vilja vera heima í ellinni.  Muhahahaha.  Smjúts.

[Hugarfluga, 28.7.2007 kl. 20:18]

Æðsileg frásögn og ég man að amma átti svona skáp. En hvar hann er veit nú enginn! Elska hluti með sál og minningar!

[Guðný Anna Arnþórsdóttir, 28.7.2007 kl. 20:44]

Til hamingju með að fá svona lifandi mubblu með sál á heimili þitt. Viss um að það fylgja henni góðir andar og góðir víbrar. Segðu mér, hvort svarar, ef þú hringir...!

[Kristín Katla Árnadóttir, 28.7.2007 kl. 21:33]

Yndisleg saga Hrönn mín og fallegur skápur og fallegar minningar.

[Hrönn Sigurðardóttir, 28.7.2007 kl. 22:03]

Takk fyrir það stelpur mínar.

Og Guðný Anna ég skal láta þig vita..........

[Heiða Þórðar, 28.7.2007 kl. 22:39]

Þakka nærandi og yndislega lesningu.

[Gunnar Páll Gunnarsson, 28.7.2007 kl. 23:22]

Svona, nú er skápurinn kominn á æskustöðvarnar, gefðu honum góða elli.

[Ásthildur Cesil Þórðardóttir, 29.7.2007 kl. 11:03]

Skemmtileg saga Hrönn mín, og ég segi eins og Jenný, það eru engar tilviljanir til.  Þetta orð er notað til að breiða yfir það, þegar fólk getur ekki með "eðlilegu móti útskýrt eitthvað sem það skilur ekkert í.

[Fanney Björg Karlsdóttir, 29.7.2007 kl. 11:23]

yndisleg saga Hrönnsla mín....lýsir þér soldið vel.... svo hlýleg eitthvað....

[Guðríður Haraldsdóttir, 29.7.2007 kl. 14:34]

Æðislegur skápur, til hamingju með hann! Mig hefur alltaf langað í svona skáp!

[Anna Sigríður Guðmundsdóttir, 29.7.2007 kl. 15:47]

Skemmtileg saga.    Ég á gamalt sófasett frá Víði.  Þegar ég var að selja íbúð sem ég átti kom eldri maður að skoða og þegar hann sá sófasettið kom bros sem náði allan hringinn.  Er þetta ennþá til sem ég smíðaði.  Hann þekkti settið sitt.  snilld.     p.s hann keypti ekki íbúðina.     Haltu áfram að skrifa svona skemmtilega.  kv.

[Halla Rut , 29.7.2007 kl. 17:51]

Amma mín átti einnig svona skáp og man ég vel hvað okkur frænkunum þótti hann leiðardómsfullur og spennandi. Þarna geymdi amma alla gersemi sína. Þessi skápur gefur mér alltaf þægilega tilfinningu.

[SigrúnSveitó, 29.7.2007 kl. 21:55]

yndisleg saga. (miklu skemmtilegri og fróðlegri en svæsnar sögur Ellýar...)

Knús&kærleikur