Helgar.....

...eru yndislegar. Þá get ég gert það sem ég vil þegar ég vil. Sofið út, lesið lengur átt tíma með þeim sem mig langar til að umgangast - án þess að ég sé að segja að mér leiðist í vinnunni - en þetta segi ég náttúrulega bara ef einhver vinnufélagi skyldi rekast hingað inn.

Eldaði svakalega góðan mat í gær, kjúklingabringur með lauk, sveppum og gulrótum í mango chutney rjómasósu sem ég bætti döðlum útí. Bakaði svo nan brauð - svona næstum því samkvæmt uppskrift sem ég fann á blogginu hans Ragnars - sem er læknir í frístundum  Hvað ætli þetta sé með mig og lækna - eitthvað svona menn í hvítum sloppum sindróm?

Nú skil ég af hverju mér gengur svona illa að verða há og grönn - þetta hefur allt með hæfileika mína í eldhúsinu að gera

Reyndi að beita hugarorkunni til að fá kryddplöntunar mínar til að vaxa betur og hraðar. Horfði og horfði en hef líklega bara gert fræin feimin. Allavega vottar ekki fyrir neinu grænu í þeim pottum enn - hef samt fulla trú á því að það komi.

Gleymdi mér alveg við að hlusta á útvarpsleikritið á rás eitt, var mætt í bílnum hjá aðalpersónunni. Af hverju eru ekki oftar leikrit í útvarpinu? Muniði hvað það var gaman á fimmtudagskvöldum í denn, þegar maður slökkti ljósin í stofunni, hafði bara kveikt á einum lampa í horninu og datt inn í útvarpsleikritið.

Fór svo út í langa göngu, í rigningunni, með litla kút, sem lítur hvorki á sig sem lítinn né kút. Finnst hann bara vera frekar svalur hundur. Leit samt svolítið undirfurðulega á mig áður en hann stakk bananatrénu í eyrun á sér og stökk af stað á eftir gæsunum og náði að bremsa sig af áður en hann bleytti utanáliggjandi kúlurnar tvær, sem hafa hingað til verið viðmiðið - svona þegjandi samkomulag - um hversu djúpt má vaða í ánni.

Ég væri alveg til í að hafa tvo sunnudaga í hverri viku.

 

Athugasemdir

[Jenný Anna Baldursdóttir, 26.3.2007 kl. 13:18]

Flottur pistill svo kósý eitthvað.  Ragnar er minn frístundalæknir líka, þe ég elda grimmt eftir uppskriftunum hans.  Ég hef heita matarást á manninum. Hljómar girnilega þessi uppskrift þín en eru döðlurnar í mangoið ekki aðeins of mikið sætt?

[Hrönn Sigurðardóttir, 26.3.2007 kl. 13:20]

neeee, mér finnst það ekki, þær gefa svo gott eftirbragð.....

[Katrín Snæhólm Baldursdóttir, 26.3.2007 kl. 13:44]

Spilaðu klassíska tónlist fyrir plönturnar þínar þá taka þær heldur betur við sér....reyndar hefur komið í ljós að barrokk tónlist og indverskur sítar eru alveg uppáhalds hjá plöntum. Hjá mér eru allir dagar sunnudagar nema sunnudagur..hann er hvíldardagurinn frá öllum hinu æðislegu sunnudögunum...hehe. Það má alveg ef maður vill hafa það ógó gott og gaman alla dagana

[Hrönn Sigurðardóttir, 26.3.2007 kl. 13:46]

já, bara verst hvað hún slítur í sundur fyrir manni letina þessi vinna

[Ásthildur Cesil Þórðardóttir, 26.3.2007 kl. 23:08]

Hrönn mín sko, plöntur hafa sinn tíma til að spíra og koma upp. Það þarf fyrst og fremst síraka og sumar vilja ljós aðrar myrkur, ertu búin að tékka á því ? þegar þær svo koma upp, þá er rosalega sniðugt að tala við þær og elska þær.  Það skilar sér mjög vel. 

[Hrönn Sigurðardóttir, 27.3.2007 kl. 08:38]

.....Ég veit Cecil mín, ég veit...... það kom bara upp í mér óþolinmæðin

[Ásthildur Cesil Þórðardóttir, 27.3.2007 kl. 19:39]

Jamm, stundum dugar hún ansi skammt mín kæra.   En ég óska þér alls velfarnaðar í ræktuninni.