Ljúf sem lamb.....

Ég gekk upp með á með Ljónshjartað - sem þessa dagana er eins og hugur manns! Ég er jafnvel að velta því fyrir mér hvort einhver hafi skipt á honum og öðrum úr álfaheimi - svona svipað og gert var með börnin í gamla daga........ nema með öfugum formerkjum Allavega sem við gengum þarna upp með á mætti ég krókódíl!! Ég hrökk í kút og hugsaði með mér: ÓMÆ!! Hvað verður næst? Mannætufiskar? Þegar ég athugaði málið nánar sá ég að vitaskuld var þetta ekki krókódíll heldur andamamma með ungana sína......... Þannig að mjög líklega verð ég svikin um mannætufiskana ef ég þekki þessar ungamömmur rétt

Annars var þetta alls ekki það sem ég ætlaði að tala um! Ég ætlaði að segja frá því þegar ég, "í gamla daga" tók strætó.

Þannig var að ég var nýflutt í bæinn og var að fara einhver fjárann sem ég man nú ekki lengur, örugglega í atvinnuviðtal........ Þetta var áður en strætóbílstjórinn á fjarkanum varð vinur minn og hinkraði þegar hann sá mig koma á handahlaupum út úr blokkinni á morgnana.

Ég átti forláta hermannafrakka - grænan - sem ég hafði keypt í búðinni sem var á horninu á Vesturgötu og einhverri annarri götu! Ég var ábyggilega afar uppreisnarleg á þessum árum þó ég hafi þá - eins og nú - verið ljúf sem lamb!

Enívei - ég tók strætó - rataði ekki rassgat í Reykjavík og vissi ekkert hvert þessi strætó var að fara. Sat samt hin rólegasta í mínum hermannafrakka og mændi út um gluggann hvort umhverfið færi nú ekki að verða kunnuglegt....... Allt í einu stoppaði strætó, langt úti á Nesi, bílstjórinn stökk út og lokaði hurðinni á eftir sér. Hann var sumsé kominn að endajöfnunarstöð! Muniði eftir þeim? Ég sat alein inni í strætó ásamt gömlum manni sem sat aftarlega og var örugglega bara að drepa tímann!! Nú voru góð ráð dýr! Hvað átti ég til bragðs að taka?

Veistu hvað ég gerði?

Ég stakk hendinn í vasann á mínum forláta hermannafrakka, tók upp sígarettupakka, hristi eina fram og kveikti í! Gamli maðurinn jarmaði eitthvað aftast - en ég hvessti á hann augun! Setti upp svokallaðan sítrónusvip.....  og hann þagnaði!

Vitaskuld var bannað að reykja í strætó! En ég vissi það ekki............. 

Vinnuna fékk ég samt og vann þar í mörg ár! Enda var þetta fyrir þá tíma þegar fólk var rekið fyrir blogg

Athugasemdir

[Einar Indriðason, 9.7.2008 kl. 16:08]

Bíddu... hvar var ísbjörninn?  Að sjá krókódíl, en ekki ísbjörn núna á síðustu og verstu tímum... þetta er bara hneyksli!  Hver kannast ekki við að hafa rekist á grænklæddan ísbjörn!?!!!

[Hrönn Sigurðardóttir, 9.7.2008 kl. 16:33]

Það eru ekki ísbirnir í skógræktinni Einar!! Það væru skógarbirnir!

[Bergljót Hreinsdóttir, 9.7.2008 kl. 16:41]

Það er náttla enginn munur á krókódíl og önd.....nema ef vera skyldu ungarnir......

Því er gott ráð að prófa að bjóða brauð....EF þetta er önd...þá étur hún brauðið...EF þetta er krókódíll...þá étur hann þig...þetta er ekki svo flókið..

Svo...eins gott að þetta var önd í þetta sinn.....

EF þú tekur LATABÆJARVAGNINN...sm er nr. 35 og ekur um Kópavog...þá myndi bílstjórinn örugglega bara þiggja eina sígó og reykja með þér...EF hann nennir að stoppa fyrir þér...en þá verðurðu líka að fíla Latabæjarrásina.....

[Hrönn Sigurðardóttir, 9.7.2008 kl. 16:43]

Gott ráð Bergljót! Ég hef brauðið með mér næst........

....en sko - ég er lööööööngu hætt að reykja ;) 

[www.zordis.com, 9.7.2008 kl. 16:59]

Elsku dúlla .... erfitt að sjá mun á krókó og önd en mér sýnist að brauðtrixið sé öðlins ráð!

Ég hef líka lent í svona stoppi á ferð 3 Hagar - Nes ef mig skortir ekki minni, svo var það fjarkinn í skólann og tvistur á hlemm.  Memory lane, gracias amiga!

[Birna Dis Vilbertsdóttir (IP-tala skráð) 9.7.2008 kl. 17:02]

Engin rómantík í strætó?

[Helga Guðrún Eiríksdóttir, 9.7.2008 kl. 17:06]

 Bann, bann, bann.. bannað að reykja í stræó.. bannað að reykja í búðum.. bíó.. pöbbum.. bann, bann og meira helvítis bann.. ætli mann verði ekki næst bannað að reykja í eigin rúmi..?! *Huhh, nöldrandi prumphænsn!

[Solla Guðjóns, 9.7.2008 kl. 18:28]

Þú kemur mér alltaf jafn skemmtilega á óvart ég hreimlega sat og histist hér í stólnum.....mætti ég krókódíl!!

Ég vissi ekki í þá gömlu að ekki mætti reykja í strætó.......og mér og fleirum var hennt út....

[Hrönn Sigurðardóttir, 9.7.2008 kl. 18:30]

[Ásthildur Cesil Þórðardóttir, 9.7.2008 kl. 21:10]

Sé þig fyrir mér prakkarinn þinn

[Huld S. Ringsted, 9.7.2008 kl. 22:16]

Þetta hlýtur að hafa verið stór og grimmdarleg andarmamma fyrst þér sýndist þetta fyrst vera krókódíll!! svona erum við mömmurnar í ham

Mér datt til hugar "Jón spæjó" þegar ég sá þig fyrir mér í hermannafrakkanum með sígarettu í munnvikinu

[Brattur, 9.7.2008 kl. 23:09]

já, eitthvað svipað henti mig... sveitamaðurinn tók strætó á Hlemmi og ætlaði vestur í bæ... en strætó ók bara í austurbæinn en kom svo aftur á Hlemm, en stoppaði hinum megin...þar fór ég út því þetta var greinilega ekki rétti strætóinn... en svo keyrði hann af stað og þá fór hann í vesturbæinn... og ég horfði bara á hann og klóraði mér í hausnum... úff flókið kerfi... en ég hef alltaf sagt, það er hollt að villast...

[Kristín Katla Árnadóttir, 10.7.2008 kl. 10:37]

Hrönn Hrönn þó bannað að reykja Annar skemmtileg lesning.

[Jenný Anna Baldursdóttir, 10.7.2008 kl. 17:59]

Helga Guðrún er með þetta.  Óþolandi djöfluls ofsóknir á reykingamenn.