Sá ég spóa suðr´í Flóa......

Dagurinn er búinn að vera ótrúlega góður!

Byrjaði á að hitta Gunna Palla kokk í sundi. Hann er jafnskemmtilegur læf og hann er í bloggheimum. Hitti líka Sól dóttur hans, hún er glettilega lík mömmu sinni. 

Þegar ég var svo nýkomin heim úr hádegismat - já, maður verður nú að taka mat um helgar líka..... var bankað á dyrnar hjá mér og úti stóð maður sem hafði áhuga á "kraminu" í gamla oldsmobílnum sem ég leyfði syni mínum og vini hans að geyma í hlaðinu hjá mér........ Þar sem ég hafði ekki grænan grun um hvað maðurinn var að tala, hóaði ég í dúlludúskinn og upphófust samræður úti á stétt sem ég hafi minna en ekkert vit á. Um V6 - sem ég hélt nú bara að væri tyggjó og V8 - gangverk, beina innspýtingu og fleira í þeim dúr. Ég leyfði þeim bara að spjalla saman strákunum. Það kom svo upp úr kafinu að þessi maður var, ásamt vini sínum á fornbílasýningunni sem stendur yfir hér í bæ - hafði rekið augun í Ollann og vildi athuga hvort hann væri falur. Hann vantaði nefnilega varahluti í bíl sem hann var að gera upp.

Þeir voru svo nýfarnir þegar Sigrún renndi í hlað með forláta sítrónupressu! Síðan hef ég drukkið sítrónu- og appelsínu safa til skiptis og set klaka útí til hátíðarbrigða Takk Sigrún - enn og aftur! Ég mæli með þessari græju! Hún er meiriháttar.......... Þarna er ég vitaskuld að tala um Sigrúnu

Ég var enn að horfa á eftir dekkjunum á bílnum hennar þegar síminn hringdi og mér var boðið í bíltúr um efri hluta Flóahrepps. Sem ég þáði

Var svo rétt nýkomin heim aftur þegar Magga hringdi og vildi að við drifum okkur í gönguna sem hún var að plana. Sem við og gerðum. 

Meiri háttar gönguferð -  eða eftirlitsferð með vatnsbólum eins og við kusum að kalla hana. Við gengum fram á ísbjarnarskít, sáum glitta í eitthvað hvítt í fjarlægð sem hreyfði sig þunglamalega og reisti sig upp á afturfæturnar. Við vorum búnar að spana hvor aðra svo upp í svokallaðan ísbjarnaræsing að þegar hrossastóð birtist allt í einu á hæðinni fyrir ofan okkur - eða ok hólnum - það er voða lítið af hæðum í Flóanum...... vorum við sannfærðar um að þarna væri ísbjörn á ferðinni og létum okkur detta fagmannlega á milli þúfna og vonuðum að ekki væri langt í næstu refaskyttu

Það er falleg fjallasýn í Flóanum. Ég sá líka til Vestmannaeyja þar sem Hallgerður eldaði humar af miklum móð um borð í Golunni. Myndavélin vildi bara ekki taka mynd af því en ég veifaði henni þar sem við áðum við Skotmannahól. Hvar sagan segir að maður nokkur hafi skotið ör inn fyrir landamerki Vælugerðis og með þeirri bogfimi bjargað lífi einhverra ættingja sinna..... Ég segi nú bara: Höfðu þessir menn ekkert að gera?? Eltandi hvorn annan í löggu og bófa um þúfur og mela!!

Það eru skemmtileg örnefni þarna í Flóanum og mikil saga á bak við þau. Þar er Skotmannahóll, Orustudalur, Mannabeinamelur - sem, eins og nafnið gefur til kynna á afar sorglega sögu um systkini sem sökuð voru um að sofa saman og voru tekin þar af lífi. Beinin þeirra blésu svo upp þarna fyrir einhverjum árum - enda segir sagan að bein þeirra sem teknir eru saklausir af lífi komi upp aftur.................

Það er frábært að ganga svona í náttúrunni, ekki svo fjarri mannabyggðum en þó algjörlega út af fyrir sig. Hlusta á lóuna, spóann og rjúpuna. Hvíla hugann, spjalla um heima og geima eða bara rölta eftir slóðinni og hlusta á náttúruna!

Yndislegt

Athugasemdir

[Birna Dis Vilbertsdóttir (IP-tala skráð) 28.6.2008 kl. 23:35]

Náttúran okkar er yndisleg þaðer satt.Ísbjarnarskítur ha ? Hvernig þekkir maður hann?

[Hrönn Sigurðardóttir, 28.6.2008 kl. 23:37]

Hann er ekkert ólíkur hrossaskít svona þegar maður spáir í það innan öruggra veggja heimilisins........

[Fanney Björg Karlsdóttir, 28.6.2008 kl. 23:40]

..... það er bara til eitt eintak af Hrönnslu..... farðu vel með það og haltu þig frá öllum Björnum......

[Fanney Björg Karlsdóttir, 28.6.2008 kl. 23:41]

gleymdi einu...... ertu með á myndlistasyningu á Hótel Hvolsvelli á morgun kl 15.00...skutl fram og til baka innifalið....

[Hrönn Sigurðardóttir, 28.6.2008 kl. 23:42]

Jahá!!!

[Fanney Björg Karlsdóttir, 28.6.2008 kl. 23:43]

oki... hringi á kristilegum tíma í fyrramálið.......úlalalal.... gaman gaman.....

[Hrönn Sigurðardóttir, 28.6.2008 kl. 23:52]

[Linda litla, 28.6.2008 kl. 23:59]

Þú ert alveg frábær penni....hehehe

[Anna Einarsdóttir, 29.6.2008 kl. 00:12]

Halló !  Hvað með hekkið ? 

.

.

Nei, djók.    Þú hefðir ekki getað varið deginum mínútunni betur.

[www.zordis.com, 29.6.2008 kl. 08:18]

Þú gerir tilveruna skemmtilega og spennandi!  Göngutúrar með þér eru meir að segja áhugaverðir!

Ætla að finna íþróttaskóna, pússa rykið og ganga með þér í huganum.

 Njóttu dagsins .... ekki amalegt að skjótast á Hvolsvöll!

[Ásdís Sigurðardóttir, 29.6.2008 kl. 10:16]

Þetta hefur verið góður dagur Hrönnslan mín. Satt er að við þurfum ekki að fara langt til að njóta fröken náttúru.  Eigðu ljúfan dag og vonandi kemurðu með færslu frá dagsferðinni þinni í dag. Knús 

[Bergljót Hreinsdóttir, 29.6.2008 kl. 11:26]

Gastu ekki tekið mynd af ísbjarnarskítnum svo maður geti mögulega þekkt hann ef maður skyldi nú rekast á svoleiðis hrúgu hér í Kópavoginum????

"...við hefðum tekið myndir en höfðum engan kubb...sönnunargagnið er astraltertugubb..."

Tókstu kannski sýni????

Eigðu góðan dag kæra mín....

[Sigrún Jónsdóttir, 29.6.2008 kl. 13:43]

Trúi þessu alveg með ísbjarnar "úrganginn", nógu asskoti kalt var var í þeim hluta Bláskógabyggðar, sem ég heimsótti.

Það var yndislegt að hitta þig Hrönn, þótt í "mýflugumynd" væri og ég vona að þú getir nú nýtt sítrusávextina inn að skinni, það ætti að koma sér vel á "sparnaðartímum" og Geir verður ánægður.

[Rebbý, 29.6.2008 kl. 17:06]

Ekki láta alla Birni vera .... þeir gætu nú verið einhverjir spennandi í mannsmynd sem daðrandi væri við

Flottur dagur sem þú hefur átt ... ekki spurning og myndlistasýning í dag með skutli getur varla hafa klikkað.

[Kristín Katla Árnadóttir, 29.6.2008 kl. 18:01]

Já þetta hefur verið góður dagur hjá þér og gaman að lesa þig og brosa af þessu öllu saman. Knús

[Helga Guðrún Eiríksdóttir, 29.6.2008 kl. 21:48]

Ég get hiklaust mælt með bangsataði fyrir Havaiírósir, ég umpottaði mínum um daginn með blandaðri skítamold og sprengisandi og ég hef aldrei séð neitt taka jafn brjálæðislegan vaxtakipp. Gott ef hann mældist ekki... kippurinn sko!

[Jóna Á. Gísladóttir, 29.6.2008 kl. 22:10]

alltaf brjálað að gera hjá þér manneskja!

Ég er meira og minna búin að missa af þessu ísbjarnarfári sem hefur tröllriðið landanum (hmmm landinu) undanfarið. Samt einhvern veginn náð að fylgjast með svona með öðru auga/eyra. Efast ekki um það eitt andartak að klessan hafi verið ísbjarnarskítur. 

Þú ert snilli dúllan mín.

[Guðný Anna Arnþórsdóttir, 29.6.2008 kl. 22:43]

[Marta B Helgadóttir, 29.6.2008 kl. 23:21]

[Helga Magnúsdóttir, 30.6.2008 kl. 11:12]

Þetta kallar maður að nýta daginn. Greinilega ekkert hangs á þér, mín kæra.

[Huld S. Ringsted, 1.7.2008 kl. 22:26]