Skriðjökull á þaki!

Sjónvarpsloftnetið slútir niðurlútt í suðuátt, skammast sín líklega fyrir dagskrána sem boðið er uppá..... þannig að ég sá aumur á því sótti kúst niður og fór út að berja niður klaka. Skilyrðin hafa hinsvegar sjaldan verið betri  

Hjá mér slútir nefnilega myndarlegur skafl fram af þakinu. Hann hefur verið að smástækka undanfarna daga og safna í sig bleytu og frosti til skiptis. Á nóttunni vakna ég við skruðninga þegar hann skríður fram eins og stökkbreyttur skriðjökull. Þetta er fremur erfið staða því hann valdi að skríða fram af þakinu þar sem inngangurinn er.....eða útgangurinn ef þannig ber undir.  Þetta veldur því að ég þori ekki að hafa Stúf Stubbalings úti á daginn, eins og honum finnst nú gaman að liggja gáfulega á tröppuskaflinum og stúdera umferðina - er líklega að velta því fyrir sér hvaða bílategund væri skemmtilegast að elta  svona ef ég ætti að skjóta algjörlega blint á hvað þetta krútt hugsar  - því ég óttast að skriðjökullinn ryðjist þá fram af þakinu og lendi á þeim eina sem nennir að búa með mér  Mér er meira sama um aðra sem þurfa að nota innganginn.

Minn nýji yfirmaður tilkynnti mér það í morgun að þetta hlass (og hann var ekki að tala um mig....) mundi steinrota mig ef það legði af stað. Allavega er ég búin að létta á farginu - ekki mikið en samt....... slepp kannski bara með höfuðverk ef það leggur af stað um leið og ég.

Ég heyrði einhversstaðar að aldraðir og öryrkjar fengju aðstoð við að moka snjó af þaki og var sátt við að bíða - en svo fór ég að reikna......

Annars er ég afskaplega sátt við lífið og tilveruna þessa dagana. Við tókum því bara rólega í morgungöngunni, því það er föstudagur og ég var búin að vinna mér inn fyrir því að byrja ekki á "slaginu" í morgun. Við hnusuðum af allri lyktinni í snjónum, eltum slóð í gegnum djúpa skafla, heilsuðum uppá stelpuna sem er alltaf á leið í vinnu á þessum tíma og liðuðumst algjörlega sauðslök meðfram ánni.

Framundan er helgin í allri sinni dýrð

Athugasemdir

[Guðný Anna Arnþórsdóttir, 18.1.2008 kl. 22:01]

Dúddelídú og bí, bí og blaka.

[Hrönn Sigurðardóttir, 18.1.2008 kl. 22:03]

Ábyggilega bara fyrir austan Dúa soldið langt fyrir hann að koma og moka..... varstu ekki annars að meina það?   Nei ég á ekki stiga!

[Hugarfluga, 18.1.2008 kl. 22:17]

Fengju aldraðir aðstoð VIÐ að moka, eða geturðu fengið aldraða til að hjálpa þér að moka?? Eru aldraðir ekki orðnir svo virkir á vinnumarkaði? Maður veit aldrei.

Knús á þig.   

[Dísa Dóra, 18.1.2008 kl. 22:45]

Góða helgi.

[Heiða Þórðar, 18.1.2008 kl. 22:59]

Góða helgi elskan mín.

[Ragnheiður , 18.1.2008 kl. 23:02]

Hehehehe æj ekki má stúta sambýlingnum..hehe þessi færsla er yndisleg hjá þér Hrönn mín hahaha

Já ég segi það eins og fluga, eru ekki aldraðir virkir á vinnumarkaði ? Getur líka prófað að hringja í lögguna og tilkynna yfirvofandi líkamsárás ?

[Ásdís Sigurðardóttir, 19.1.2008 kl. 00:17]

Þetta er svo fyndin færsla að ég hefði viljað framhaldssögu, sé þetta allt ljóslifandi fyrir mér. Hundur í slóð, jökull á ferð og kona ein að reyna að tækla vandamálin. Þú hringir nú í mig ef þetta versnar, við öryrkjar kunnum alltaf ráð til að láta aðra gera hlutina :):)  Eigðu góða helgi elskið mitt.

[Fanney Björg Karlsdóttir, 19.1.2008 kl. 00:47]

Veistu......ég var einmitt að hugsa þetta sama og þú..um þetta ferlíki sem "lekur" niður þakið hjá þér...... var að spekulera í að banka hjá þér... og bjóða fram aðstoð bóndans...... sbr aldraðir og vinnumarkaðurinn.... en sá þá að klukkan var allveg að verða fréttir...... ég kíki á þig seinna......kanski ferlíkið verði enn á sínum stað........

lovejú.....

[Gunnar Páll Gunnarsson, 19.1.2008 kl. 08:56]

Góðan daginn Selfoss! Hérna í Lejre skín sólin eins og henni væri borgað fyrir það, það er ca 7gc sunnanmegin og fyrstu vetrargosarnir eru byrjaðir að glenna sig. Fróðpir menn spá því að veðurfar í DK verði eins og í Normadí. Þaeas, sjaldan "vetur" og melló sumur. Best að byrja á þriðja kaffibollanum, sturtast og hella sér svo í það að smæla framan í heiminn. Ég sendi eina gráðu yfir til ykkar og skriðjökulsins á þakinu.

Kveðjur heim á Selfoss. 

[Ágúst H Bjarnason, 19.1.2008 kl. 10:21]

Góða helgi í snjónum

[www.zordis.com, 19.1.2008 kl. 11:15]

Þú tæklar þetta.

Gætir búið til snjóbolta og hent upp á þak sem rúlla upp á sig, myndir heila snjókalla fjölskyldu og fortóinu hjá þér og allir sáttir!

Annars væri ég til í að renna mér niður á sleða og ryðja þessu niður fyrir þig .....

Njóttu helgarinnar meðfram Ölfusánni með litlum ljúfum Stúf stubbaling.

[Rebbý, 19.1.2008 kl. 12:28]

myndi styðja hugmyndinni að hringja í lögguna og tilkynna yfirvofandi líkamsárás ef ég vissi ekki að þér þykja þeir óspennó og myndir ekki daðra við þá.
en gættu vel að stubbaling, ekki má hann verða undir "hlassinu" og reyndar ekki þú heldur.
góða helgi !!

[Heiða Þórðar, 19.1.2008 kl. 13:55]

Það eru 340 dagar til jóla Hrönnslan mín og komin tími á aðra færslu hjá þér...

[Marta B Helgadóttir, 19.1.2008 kl. 14:53]

ég bara hlæ og hlæ að þessari frábæru fyndni..þvílíkur sjóðbullandi húmorinn í þér kona alveg dýrðleg og engri lík 

Í minni sveit (107 Rvik) var þorpslöggan (Sæmi Rokk) víst boðinn og búinn að hjálpa konum í ýmsum nauðum. Enda mörg börnin þar um slóðir einkennilega áþekk honum.  

[Kristín Katla Árnadóttir, 20.1.2008 kl. 15:15]

Eigðu góðan sunnudag Hrönn mín og takk fyrir skemmtilegt blogg.

[Ásthildur Cesil Þórðardóttir, 20.1.2008 kl. 17:50]

Viltu gjöra svo vel að fara varlega stelpa, það er ekkert smámál að fá svona flykki í hausinn og ég er ekki að tala um þig Reyndar getur svona farg verið stórhættulegt, og við viljum ekki missa þig

[Steingerður Steinarsdóttir, 20.1.2008 kl. 19:11]

Þinn stökkbreytti skriðjökull er efni í fyrirtaksvísindarannsókn. Nú skrifar þú MS-ritgerð um hann og þar með er framtíðin ljós. Fyrirlestraferðir um allan heim og margt fleira skemmtilegt.

[Huld S. Ringsted, 20.1.2008 kl. 23:09]

Vonandi áttir þú góða helgi og fékkst engan skriðjökul í hausinn

[Birna Dis Vilbertsdóttir (IP-tala skráð) 21.1.2008 kl. 14:36]