Me and my friend Ben...

.....skaust á Stykkishólm í gær að sækja Dúlludúskinn. Á leiðinni krufði ég samband karla og kvenna og komst að því að hamingja karla er alfarið komin undir konum. Segi ykkur kannski nánar af því síðar  

Þegar ég var við Fáskrúðarbakka hringdi vinnufélagi minn í mig og spurði mig hvar ég eiginlega væri. Ég sagði honum að bóndinn á Rauðkollustöðum hefði beðið mig að koma og slökkva eldana sem loguðu í mónum hjá honum og svo ætti ég stefnumót við Ben Stiller í Hólminum klukkan sautjánhundruð - sharp.... Maður lýgur að fleirum en fimm ára og gerir nú annað en stemma af lánadrottna sjáiði til 

 Ég tók upp tvo puttaferðalanga við Vegamót. Þeir voru á leiðinni á Grundarfjörð að skoða Kirkjufell og ætluðu síðan að kíkja á Snæfellsjökul. Ég sagði þeim að Ben  væri á Stykkishólmi en þeim var undarlega alveg sama. Þeir sögðu mér að þeir væru frá Eistonia og ég flissaði með sjálfri mér alla leið yfir nesið. Sat samt á mér að biðja þá að syngja.....

Rosalega fallegt í Stykkishólmi. Ég skokkaði upp á Stykkið - eða hvað það nú heitir bjargið fyrir ofan höfnina og þvílíkt útsýni - maður minn. Ég stakk því að Dúskinum að hann fyndi sér skipstjóradóttur að búa með í Hólminum. Hann tók fálega í það enda miklu skemmtilegra að búa með Mömmu sinni  

Hann sagði mér hinsvegar frá „sérvitri“ konu sem býr niðri við sjóinn í stóru, fallegu húsi hvar hundurinn hennar býr í íbúð á neðri hæðinni..... Ég sagði honum að ég hefði nú alltaf ætlað að vera þessi kuldalega kéddling á klöppinni en ef einhver önnur væri búin að byggja húsið gæti ég svosem alveg búið þar líka. Við kíktum aðeins á nunnurnar og Dúskurinn sagði mér að hann hefði í fyrsta skipti á ævinni séð nunnu þarna. Já.... maður lærir margt á sjónum ;)

Á leiðinni heim vorum við að hlusta á fréttir þar sem m.a. kom fram að öryrkjabandalagið ætli að kæra forsetakosningarnar og enginn vissi hvernig ætti að snúa sér í því. Einkasonurinn hlustaði á fréttaflutninginn og sagði: "Ha... heyrði ég rétt....?" "Já, já," sagði ég og útskýrði fyrir honum að fötluðum fyndist á rétti sínum brotið með fyrirkomulagi kosninganna. 

Og þá sagði Dúskurinn þau fleygu orð sem sannfærðu mig um, á einu augabragði, að hann væri svo miklu, miklu skyldari elstu systur minni - sem vildi alls ekki að Bessastaðir yrðu útbíaðir í kúkableyjum -  en mér.

Hann sagði nefnilega af mikilli sannfæringu: "Ég vissi ekki að fatlaðir hefðu kosningarétt  - ég meina ef þú getur ekki exað sjálf/ur þá hefur þú ekkert í kosningaklefann að gera!" 

Ég flissaði alla leið í Borgarnes og þakkaði Guði fyrir að formanni öryrkjabandalagsins hefði ekki verið boðið í þennan bíltúr. 

Síðastliðnir dagar

.......hafa verið viðburðarríkir.

Á fimmtudaginn reiknaði ég út laun í fyrsta skipti á ævinni og gekk bara býsna vel, sérstaklega með mín laun.....

Síðan læddist ég yfir heiðina um nótt í snælduvitlausu veðri. Það var svo brjálað veður að ég sá ekki á milli augnanna á mér, hvað þá á milli stika. Þorði samt hvergi að stoppa því þá hefði ég aldrei komist af stað aftur og seiglaðist þetta á þrjózkunni! Komst til flugstöðvarinnar við illan leik og uppskar ekki svo blítt augnaráð frá innbókunarborðinu þegar ég tékkaði mig inn rúmum hálftíma fyrir brottför! En hvað leggur kona ekki á sig fyrir Danmerkurferð....  Frétti svo þegar ég var nýlent á Kastrup að Heiðinni hefði verið lokað stuttu eftir að ég fór yfir. Það átti sko ekki að missa fleiri kellingar úr landi.  

Í Danmörku var hinsvegar sumarbjartur dagur. Ég rifjaði upp hvernig Kaupmannahöfn lítur út, fór út að borða, drakk rauðvín í massavís, talaði dönsku og tók að öllu leyti upp siði innfæddra............. Gisti á gömlu hóteli, nálægt miðbænum, þar sem gatan er steinlögð og íbúðarhúsin gömul, uppgerð pakkhús. Mér líður alltaf eins og ég sé komin heim þegar ég kem til Danmerkur. Kannski er það vegna þess hvað Danir segja "hej" af mikilli innlifun og láta, allir sem einn, eins og þeir hafi saknað mín!! Ég held ég hafi villst á leið til jarðar á sínum tíma, enda grét Danmörk þegar ég fór.......

Leigubílstjórinn spurði mig á leiðinni út á flugvöll hvort ég væri á leiðinni til Færeyja eða Íslands - Ég sagði honum að ég væri ööööörlítið sár, ég hefði talið mig tala svo góða dönsku!! Hann hló og samþykkti það, sagði að það byggju bara svo margir Íslendingar í Danmörku að hann hefði þekkt hreiminn....... snöggur að bjarga sér fyrir horn!

Nú bíður mín sunnudagskaffið og dönsku ostarnir. Óska ykkur gleðilegs fyrsta sunnudags í aðventu.

 

Verslunarmannahelgarhamingja

Þessi verslunarmannahelgi er með þeim betri sem ég hef upplifað. Fékk frábæra heimsókn í gær og fór í stórgóða heimsókn í dag.

Engar áhyggjur vegna afkvæma á útihátíð! Engin útilega hjá mér! Beit það í mig í ár að ég ætlaði ekki að vinna þessa verslunarmannahelgi. Held svei mér þá að ég hafi verið að vinna þessa helgi sl. sjö ár!!

 Í gær var bankað hjá mér, úti stóð Linda með Auði Erlu! Við fórum saman að heimsækja mömmu og pabba. Þangað komu svo Eyfi og Viktor

Börnunum var sagt að þau fengju engar vöfflur ef þau týndu ekki saman alla krossa á gólfinu. Þau voru rosa dugleg - svona til að byrja með......

Við Linda fórum síðan út á róló með börnin á meðan Eyfi málaði - alltaf duglegur Eyjólfur!!! Góður dagur - takk fyrir að sækja mig Linda mín

Við labbakútur fundum þessa ferðalanga í kvöldgöngunni okkar, þeir voru búnir að tjalda undir brúnni, er ekki viss á hvaða útihátíð þeir voru......  

Í morgun vöknuðum við labbakútur snemma, fórum út í skóg að hlaupa og skelltum okkur svo austur fyrir Þjórsá í heimsókn til Heklu litlu, sem er algjör dúlla, og "mömmu hennar og pabba" sem eru líka dúllur  Labbakútur réði sig í vist hjá Trausta bónda og fékk að leika smalann - fann sig alveg þar...... á meðan ég drakk kaffi og úðaði í mig vöfflum.....

  Þau voru þarna "rétt áðan" 

Þarna ákvað myndavélin að batterýin væru búin og ekki yrðu teknar fleiri myndir í sveitinni. Þau Fanney og Trausti rækta hreint ótrúlega fallegar rósir sem ég steinféll fyrir. Fanney nestaði mig svo upp með hamingjusöm egg úr hamingjusömu hænunum sínum áður en við skunduðum heim á leið.

Nú kraumar gúllassúpan í pottinum og Loki litli steinsefur. Hann hefur varla hreyft sig síðan við komum heim.

Takk Fanney mín fyrir góðan dag. Nú rata ég til ykkar og kem ábyggilega aftur. Var ég búin að segja þér hversu glöð ég er með að þú ákvaðst að heilsa upp á mig í Nóatúni í vor?

 

Árás í leið í félagsmiðstöð miðaldra húsmæðra!

Varð fyrir áfalli í dag, þegar ég í þungum þönkum, afar heimspekilegum - að sjálfsögðu  .....var allavega ekki að hugsa um karlmenn  varð fyrir árás á leiðinni inn í Bónus! Hjartað tók á sprett og adrenalínið var á yfirflæði þegar Fanney tók um axlir mínar og sagði eitthvað sem ég hvorki heyrði né man....... Við flissuðum saman í kælinum dágóða stund, enda erum við báðar með eindæmum fyndnar!

Ég er að skipuleggja ferð austur fyrir Þjórsá! Alla leið....... Já, já það er ekki flanað að neinu á mínu heimili..... Ætla að heimsækja Fanney og "bóndann" í sveitina. Kíkja á Heklu litlu og kenna henni einhverja ósiði  

Annars bara hefðbundinn laugardagur hjá mér. Tiltekt og þvottur. Ætla núna að búa til salat og grilla kjúklingabringur. Svei mér ef ég fæ mér ekki bara hvítvín líka.

Vona að þið hafið átt góðan dag

 

Letidagur......

Fór með stubbaling upp með á. Þéttur úði og lyktin yndisleg. Gæti ímyndað mér að hann hafi fundið ýmisskonar lykt þegar hann "las" jarðveginn. Moldin angaði meira að segja eins og bara mold getur ilmað eftir svona langvarandi þurrka.

Haldiði að það hafi ekki einhver verið búinn að planta hjólhýsinu sínu þarna? Gvöð við vorum svo hneyksluð........ Veit fólk ekki að þetta er okkar staður? Les fólk ekki bloggið okkar eða hvað?

Á meðan við vorum úti breyttist úðinn í alvöru rigningu og við komum þokkalega blaut inn. Þetta er góður dagur fyrir letidag.

Eigið góðan......

knús

Rok....

.......moldrok!

Ímyndið ykkur alla þessa mold, sem berst svo inn um gluggana mína og sest að hjá mér, eingöngu hluti af henni fýkur þarna út á sjó, bróðurparturinn er hér! Ég gæti hugsanlega gróðursett kaktusa í mublunum

Og ég sem ætlaði að taka til í dag.....

Heppin?!¿

Ég.....

 ....er lítið gefin fyrir þjóðhátíð, þannig að ég tók daginn ekki sérlega hátíðlega. Var á leið í langa göngu með litla stúf, þegar við mættum skrúðgöngunni. Við dokuðum við á meðan hún rann hjá, fyrst var hann spakur að bíða bara rólegur hjá "mömmu" sinni. Svo varð hann hræddur við trommusláttinn (kom mér verulega á óvart, því nú er hann bróðir hans Ljónshjarta ) og leitaði skjóls hjá mér, sem var nú í lagi ég var meira en tilbúin að vernda hann fyrir þessum hræðilegu hljóðfærum. Svo sá hann að það voru hundar á ferli í skrúðgöngunni og mannaðist (eða segir maður hundaðist....?) nú heldur, restaði á því að hann bauð einum Rottweiler í fighting - þá nefndi ég við hann að það væri þjóðhátíð og maður snapaði ekki fighting þennan dag. Hann lét sér segjast.....

Kom svo heim og fór að taka til og þvo þvotta- enda ekki vanþörf á - hef ekki nennt að taka til síðan ég byrjaði í sumarfríi. Nú er allt hreint og fínt, eins og í bók eftir Snjólaugu  Braga, stubbalingur steinsefur og ég gleymdi að fara í plöntuskoðunarferð út að Vatnsenda á degi villtra planta. Af hverju minntuð þið mig ekki á það?

Dízes, hvernig gat ég gleymt þessu? Þetta var það eina sem ég ætlaði að gera í dag..... Vell það er huggun harmi gegn að það vottar ekki fyrir harðsperrum eftir hlaupið í gær!

Svona er að vera húsmóðir.....

 

 

Vér mótmælum...

 Að vandlega íhuguðu máli og vegna þess að ég flana aldrei að neinu svo ég verði nú örugglega ekki talin örgeðja, skapvond eða illa stödd í tíðahringnum, hef ég ákveðið að mótmæla launahækkunum seðlabankastjóra í dag.

Ég ætla að fylgja fordæmi sem Davíð setti svo eftirminnilega hér um árið og og fara í Seðlabankann seinni partinn, taka allan minn pening þar út og loka öllum reikningum. Innlendum sem erlendum!!! Í framhaldinu mun ég stofna reikning í Sviss þar sem bankastjórar eru á skítalaunum.

Hvet alla til að fylgja fordæmi mínu!

 

 

 

PS veit einhver hvað Davíð er að gera í dag?

PSS þið þekkið mig á því að ég verð á rauðum skóm, með varalit og hund að þrasa við dyravörðinn um hvort hann megi koma inn eður ei......

Sunnudagur...

...og ekkert blað komið. Búin að fara út að labba með litlakút, hittum fullt af fuglum sem vildu endilega leika......

Ætlaði svo að koma heim og hella mér uppá kaffi, rista mér brauð með smjöri sultu og osti og lesa blaðið á meðan!! Þvílík ósvífni að vera ekki búin að koma með blaðið til mín.

Ætli ég skundi þá ekki, prúð og frjálsleg í fasi, út á benzínstöð og sæki mér blaðið, get þá hent hinum í leiðinni.

PS úr hvaða söngleik er þessi laglína?

smjúts á ykkur

sænskt sumar

Vaknaði ótrúlega snemma í morgun, heyrði að það var ausandi rigning og ákvað að nú væri góður tími til að hlaupa. Fór í gallann tók hundinn, sem var yfir sig spenntur að fara út með mér..... Kom mér alveg á óvart  og skundaði upp á völl, hljóp þar í hálftíma eða þangað til ég var orðin svo blaut að það skipti ekki máli lengur....

Fór heim og beint upp í rúm, fékk mér að vísu einn banana áður - af því að þeir eru svo GÓÐIR Magga - hún nebblega þolir ekki banana. Steinsvaf svo fram að hádegi og vaknaði í sól og blíðu. Það var sumsé skollið á sumar

Fór með mömmu í hina sænsku stórverzlun IKEA, í borg óttans,  Jú jú þetta er mynd sem kemur þegar ég gúggla IKEA - hef samt aldrei séð þetta fólk þar. Það er kannski á einhverjum öðrum tíma en ég. Keypti rosalega vandaða sænska kodda...... sem ég ætla að sofa á í framtíðinni, verð soldið svona eins og prinsessan á bauninni

Er núna að bíða eftir dr. House - sem er eini læknirinn í lífi mínu, enda með afbrigðum heilsuhraust.

Svo á ég afmæli á morgun!!!! Allir að muna eftir að óska mér til hamingju með daginn. Allir velkomnir í heimsókn, dresscode: stutt pils, rauðir skór - gjöf. Allir sætir strákar boðnir sérstaklega velkomnir, sami dresskóði

Knús